बसमध्ये चढत असताना महिलेच्या गळ्यातील सोन्याचे मंगळसूत्र लंपास
भडगाव : बसमध्ये चढत असताना एका महिलेला गर्दीचा फायदा घेत अज्ञात चोरट्याने गळ्यातील सुमारे १४ हजार रुपये किमतीचे सोन्याचे मंगळसूत्र चोरून नेल्याची घटना भडगाव बसस्थानक परिसरात घडली. ही घटना २४ मे रोजी दुपारी साडेचारच्या सुमारास घडली असून, याप्रकरणी २९ मे रोजी भडगाव पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
याबाबत अधिक माहिती अशी की, सुनंदा बापू पाटील ( रा. भालगाव, ता. एरंडोल) या २४ मे रोजी दुपारी भडगाव बसस्थानकात आल्या होत्या. त्या बसमध्ये चढत असताना गर्दीचा फायदा घेत अज्ञात चोरट्याने त्यांच्या गळ्यातील १४ हजार रुपये किमतीचे सोन्याचे मंगळसूत्र चोरून नेले.
घटनेनंतर मंगळसूत्र हरवल्याचे त्यांच्या लक्षात येताच त्यांनी तत्काळ भडगाव पोलीस ठाण्यात धाव घेऊन तक्रार दाखल केली. पोलीसांनी अज्ञात चोरट्याविरुद्ध गुन्हा दाखल केला असून, पुढील तपास पोलीस कॉन्स्टेबल विजय जाधव करीत आहेत.
