अवैध वाळू वाहतूक करणाऱ्या पाच जणांविरुद्ध गुन्हा दाखल
धरणगाव (प्रतिनिधी) – तालुक्यातील बांभोरी गावाजवळील तापी नदीपात्रातून सुरू असलेल्या अवैध वाळू उपसावर कारवाईस गेलेल्या महसूल पथकाला गुरुवारी (दि. १२ जून) सकाळी ८ वाजता धक्कादायक प्रसंगाचा सामना करावा लागला. वाळू माफियांनी पथकातील कर्मचाऱ्यांशी धक्काबुक्की करत ट्रॅक्टरमधील वाळू जागेवरच फेकून दिली आणि वाहनांसह पलायन केले. याप्रकरणी पाच जणांविरोधात धरणगाव पोलिस ठाण्यात गुन्हा दाखल करण्यात आला आहे.
गोपनीय माहितीनुसार, बांभोरी गावाजवळील तापी नदीपात्रात मोठ्या प्रमाणावर अवैध वाळू उपसा सुरू असल्याची माहिती महसूल विभागाला मिळाली होती. त्यानुसार, महसूल पथकाने सकाळी अचानक छापा टाकला. त्या वेळी पाच ट्रॅक्टरमधून वाळूची अवैध वाहतूक सुरू असल्याचे आढळले.
पथकाने कारवाईस सुरुवात केली असता ट्रॅक्टर मालक व चालकांनी पथकातील अधिकाऱ्यांशी धक्काबुक्की सुरू केली. संधी साधून त्यांनी वाळू जागेवरच रिकामी केली आणि ट्रॅक्टर व ट्रॉलीसह पळ काढला. या घटनेमुळे महसूल पथकाला कारवाई अपूर्ण ठेवून रिकाम्या हाताने परतावे लागले.
याप्रकरणी मनोहर शिवराम बाविस्कर (रा. खोटे नगर, जळगाव) यांनी दिलेल्या तक्रारीवरून गंगाराम शामराव सोनवणे, दिनेश भागवत नन्नवरे, दीपक विजय सपकाळे, विशाल विजय सपकाळे आणि ऋषी उर्फ गुड्डू साळुंखे (सर्व रा. बांभोरी, ता. धरणगाव) यांच्याविरोधात गुन्हा दाखल करण्यात आला आहे.
या प्रकरणाचा तपास सहाय्यक फौजदार सुनील लोहार यांच्या मार्गदर्शनाखाली सुरू आहे. दरम्यान, महसूल अधिकाऱ्यांवर अशा प्रकारे झालेल्या हल्ल्यामुळे प्रशासनात आणि नागरिकांमध्ये तीव्र संताप व्यक्त केला जात आहे. नदीपात्रातील अवैध वाळू उपसावर कठोर कारवाई करावी, अशी मागणी स्थानिक नागरिकांकडून केली जात आहे.
