सावदा-मोठे वाघोदा रस्त्यावर भीषण अपघात

एकाचा जागीच मृत्यू, एक जखमी; ट्रक चालकाविरुद्ध गुन्हा दाखल
सावदा (ता. रावेर) – सावदा ते मोठे वाघोदा दरम्यान बुरहानपूर–अंकलेश्वर राष्ट्रीय महामार्गावर असलेल्या हॉटेल कुंदन समोर दुचाकी व ट्रकच्या भीषण अपघातात एकाचा जागीच मृत्यू झाला, तर एकजण किरकोळ जखमी झाला आहे. ही घटना गुरुवारी रात्री घडली.
मिळालेल्या माहितीनुसार, हर्षल नारायण सरोदे (वय ४५, रा. मस्कावद) आणि हर्षल बाजीराव पाटील हे दोघे सावदा येथे काम आटोपून हिरो होंडा दुचाकी (क्र. एमएच १९ एडी ०१४५) वरून मस्कावदकडे परत जात होते. दरम्यान, मागून भरधाव वेगात आलेल्या टाटा कंपनीच्या ट्रकने (क्र. पीबी ६५ बीबी ९१८२) त्यांच्या दुचाकीला जोरदार धडक दिली.
या अपघातात हर्षल नारायण सरोदे यांचा जागीच मृत्यू झाला, तर हर्षल पाटील हे किरकोळ जखमी झाले. जखमीवर स्थानिक रुग्णालयात उपचार करण्यात आले.
या घटनेबाबत हर्षल पाटील यांनी सावदा पोलीस ठाण्यात दिलेल्या फिर्यादीवरून ट्रक चालकाविरुद्ध गुन्हा दाखल करण्यात आला असून, या प्रकरणाचा तपास स.पो.नि. विशाल पाटील यांच्या मार्गदर्शनाखाली पो.हे.कॉ. उमेश पाटील करत आहेत.