वाघूर नदीकिनारी अवैध मुरूम उत्खननावर तहसीलदारांची कारवाई; ७ वाहने जप्त
भुसावळ (ता. ३० जून २०२५): भुसावळ तालुक्यातील कडगाव शिवारात वाघूर नदीजवळ सुरू असलेल्या अवैध मुरूम उत्खननावर भुसावळच्या तहसीलदार नीता लबडे यांनी सोमवारी दुपारी धडक कारवाई करत छापा टाकला. महसूल व पोलिसांच्या संयुक्त पथकाने केलेल्या या कारवाईत ६ डंपर आणि १ जेसीबी मशीन असे एकूण सात वाहने जप्त करण्यात आली.
तहसीलदार लबडे यांना वाघूर नदीच्या परिसरात अवैध उत्खनन सुरू असल्याची गोपनीय माहिती मिळाल्यानंतर त्यांनी तातडीने पथकासह घटनास्थळी धाव घेतली. त्यावेळी काही ट्रक उत्खनन करून मुरूम भरत असताना रंगेहाथ पकडण्यात आले. महसूल व पोलीस पथकाची गाडी पाहताच काही तस्करांनी वाहनं सोडून पळ काढण्याचा प्रयत्न केला, मात्र पाठलाग करून त्यांना ताब्यात घेण्यात आले.
या कारवाईत जप्त केलेले सर्व वाहन व साहित्य नशिराबाद पोलिसांच्या बंदोबस्तात भुसावळ तहसील कार्यालयात सायंकाळपर्यंत जमा करण्यात आले.
या कारवाईमुळे तालुक्यातील अवैध गौण खनिज उत्खनन करणाऱ्यांमध्ये भीतीचे वातावरण निर्माण झाले आहे.
तहसीलदार नीता लबडे यांच्यासह महिला मंडळाधिकारी रजनी तायडे, मंडळाधिकारी प्रफुल्ल कांबळे, प्रवीण पाटील, तलाठी नितीन तेली, गोपाळ भगत, मंगेश पारिसे, रोशन कापसे, तेजस पाटील, जितेश चौधरी, संदीप पाटील आदी अधिकारी व कर्मचाऱ्यांनी या कारवाईत सक्रिय सहभाग घेतला.
