मलकापूर पीआरएसवर मध्य रेल्वेची कारवाई; दोन दलाल अटकेत, १० लाखांच्या तिकिटांचा पर्दाफाश
मलकापूर (जळगाव) – प्रतिनिधी
मध्य रेल्वेच्या दक्षता पथकाने गुरुवारी (दि. २२) मलकापूर येथील प्रवासी आरक्षण केंद्रावर (पीआरएस) मोठी कारवाई करत बेकायदेशीर तिकीट विक्रीचा मोठा प्रकार उघडकीस आणला. या कारवाईत दोन दलालांना अटक करण्यात आली असून, तब्बल १० लाखांहून अधिक किमतीची १८२ रेल्वे तिकिटे जप्त करण्यात आली आहेत.
विशेष माहितीच्या आधारे दक्षता पथकाने पीआरएस कार्यालयावर छापा टाकला. यावेळी ३,९६० रुपयांचे एसी तत्काळ तिकीट असलेले दोन संशयित व्यक्ती आढळून आले. त्यांची ओळख संजय चांडक (स्थानिक एजंट) आणि १७ वर्षीय सहाय्यक प्रसाद काळे अशी झाली.
चौकशीत, संजय चांडकने मुंबईतील कुख्यात दलाल ‘ठाकूर’ याच्याशी थेट संबंध असल्याचे उघड झाले. त्याने मलकापूर येथून बुक केलेल्या १८२ जेसीआर (Journey cum Reservation) तिकिटांचे फोटो व्हॉट्सॲपवरून ठाकूरला पाठवले होते.
जप्त तिकिटांमध्ये २३ सक्रिय तिकिटांची किंमत १,६१,५३५ रुपये, तर १५९ जुन्या तिकिटांची किंमत ८,४८,२९८ रुपये असून, एकूण तिकिटमूल्य १०,०९,८३३ रुपये इतकी आहे. सर्व तिकिटे बेकायदेशीरपणे पुनर्विक्रीसाठी आरक्षित करण्यात आली होती.
रेल्वे कायद्यानुसार गुन्हा दाखल
दोघा आरोपींना अटक करून रेल्वे संरक्षण दलाच्या (RPF) मलकापूर विभागाकडे सोपवण्यात आले आहे. त्यांच्याविरुद्ध रेल्वे कायदा कलम १४३ अंतर्गत गुन्हा CR नं. २७८/२०२५ नोंदवण्यात आला आहे. या रॅकेटमध्ये वापरलेली २३ लाइव्ह तिकिटे तत्काळ ब्लॉक करण्यात आली आहेत.
कारवाई सुरूच राहणार
या प्रकारामुळे रेल्वे प्रवाशांच्या तिकिटांवर डोळ्यात तेल घालून लक्ष ठेवण्याची गरज अधोरेखित झाली आहे. मध्य रेल्वेच्या दक्षता पथकाने स्पष्ट केले आहे की, बेकायदेशीर तिकीट व्यवहार रोखण्यासाठी आणि प्रामाणिक प्रवाशांना पारदर्शक सेवा मिळवून देण्यासाठी कारवाई पुढेही सुरूच राहणार आहे.
