अहमदाबाद विमान दुर्घटनेत सर्व २४२ प्रवाशांचा मृत्यू; काही स्थानिकांचाही मृत्यू झाल्याची भीती
अहमदाबाद (प्रतिनिधी) – गुरुवारी (दि. १२ जून) दुपारी एक वाजून ३८ मिनिटांनी अहमदाबाद येथील सरदार वल्लभभाई पटेल आंतरराष्ट्रीय विमानतळावरून लंडनच्या गॅटविक विमानतळाकडे झेपावलेले एअर इंडियाचे बोइंग ७८७-८ ड्रीमलायनर (AI-171) हे विमान अवघ्या पाच मिनिटांत शहरातील मेघानी नगर परिसरात कोसळले. या भीषण दुर्घटनेत विमानातील सर्व २४२ प्रवाशांचा मृत्यू झाल्याची माहिती अहमदाबादचे पोलिस आयुक्त जी.एस. मलिक यांनी दिली असून, अपघाताच्या ठिकाणी मोठ्या प्रमाणावर लोकवस्ती असल्याने काही स्थानिक नागरिकांचाही मृत्यू झाल्याची शक्यता वर्तवली जात आहे.
विमानातील प्रवासी आणि पथक – अपघातग्रस्त विमानात २३० प्रवासी आणि १२ क्रू मेंबर्स होते. यामध्ये १६९ भारतीय, ५३ ब्रिटिश, ७ पोर्तुगीज आणि १ कॅनडियन प्रवासी होते. विमानाचे संचालन कॅप्टन सुमीत सभरवाल (८,२०० तासांचा अनुभव) आणि फर्स्ट ऑफिसर क्लाइव कुंदर (१,१०० तासांचा अनुभव) करत होते. फ्लायटरडार२४ नुसार, विमान ६२५ फूट उंचीवर असताना शेवटचा सिग्नल प्राप्त झाला. विमान कोसळण्याआधी “MAYDAY” सिग्नल दिला गेला होता, ज्याचा अर्थ तातडीचा जीवितधोक्याचा इशारा असा होतो.
अपघातानंतरच्या हालचाली – विमान कोसळल्यानंतर त्याने पेट घेतला आणि परिसरात घनदाट धुराचे लोट पाहायला मिळाले. बचावकार्य वेगाने सुरू करण्यात आले असून एनडीआरएफच्या सहा तुकड्या (गांधीनगरहून ३ आणि वडोदऱ्याहून ३) घटनास्थळी दाखल झाल्या. जखमींना सिव्हिल हॉस्पिटलमध्ये हलवण्यासाठी ग्रीन कॉरिडोर तयार करण्यात आला. काही वेळ विमानतळावरील उड्डाणे थांबवण्यात आली होती, परंतु आता ती पुन्हा सुरू करण्यात आली आहेत.
सरकारी प्रतिसाद आणि शोकसंदेश – केंद्रीय नागरी उड्डाण मंत्रालय, एअर इंडिया, आणि स्थानिक प्रशासन सतत समन्वय साधत असून घटनास्थळी तपास व मदतकार्य सुरू आहे. डीजीसीए आणि विमान अपघात तपास ब्युरो (AAIB) यांनी तपास सुरू केला आहे. पंतप्रधान नरेंद्र मोदी यांनी ही दुर्घटना “हृदयद्रावक” असल्याचे सांगत संबंधित मंत्र्यांशी संपर्क साधून मदतीचा आढावा घेतला. राष्ट्रपती द्रौपदी मुर्मू, यूकेचे पंतप्रधान कीर स्टारमर, आणि रशियाचे राष्ट्राध्यक्ष व्लादिमीर पुतिन यांनी या दुर्घटनेप्रती तीव्र शोक व्यक्त केला आहे.
हेल्पलाइन क्रमांक – नागरी उड्डाण मंत्रालयाने ऑपरेशनल कंट्रोल रूमसाठी 011-24610843, 9650391859 तर सामान्य माहितीसाठी 9974111327 क्रमांक जाहीर केले आहेत. एअर इंडियाने 18005691444 आणि अहमदाबाद पोलिसांनी 07925620359 हे आपत्कालीन क्रमांक जारी केले आहेत.
