सांगली जिल्ह्यात तरुणाचा मृतदेह संशयास्पद स्थितीत आढळला. त्याचे हात बांधलेले होते आणि घटनास्थळी कोणतीही मोटरसायकल किंवा फोन नव्हता. या घटनेमुळे परिसरात खळबळ उडाली असून, पोलिसांकडून अधिक तपास सुरू आहे. कर्नाटक राज्यातील अथणी तालुक्यातील खिळेगाव येथील तरुण गणेश राजू शिवपुंजे (२२) याचा मृतदेह कवठे महांकाळ तालुक्यातील रांजणी गावच्या हद्दीत आढळला. लिंबाच्या झाडाला गळफास लावलेल्या संशयास्पद अवस्थेत कवठेमहांकाळ पोलीसांना तरुणाचा मृतदेह आढळून आला. ही घटना गुरूवारी दुपारी बारा वाजण्याच्या सुमारास उघडकीस आली.रांजणी येथील घटनास्थळी खिळेगाव येथील नागरिकांनी गर्दी केलेली होती. तरुणाचे हात पाठीमागील बाजूस हेडफोनच्या वायरने बांधलेले दिसून आले.
घटनास्थळी कवठे महांकाळ आणि अथणीचे पोलीस दाखल झाले होते. घटनास्थळ पाहता गणेश शिवपुंजेच्या मृत्यूबाबत संशयास्पद अंदाज व्यक्त केला जात आहे.मृत तरूण गणेश शिवपुंजे याच्यावर अथणी पोलीस ठाण्यात पोक्सो अंतर्गत गुन्हा दाखल असल्याची माहिती आहे. घटनास्थळी मोटरसायकल अथवा फोन अशा गोष्टी आढळून आलेल्या नाहीत. खिळेगावपासून रांजणी येथील कुरण दोन ते अडीच कि.मी.अंतरावर आहे. रांजणी येथील घटनास्थळी तातडीने पोलिसांनी पंचनामा केला. मृतदेहावर कवठे महांकाळ येथील उपजिल्हा रुग्णालयात शवविच्छेदन करण्यात आले.खिळेगाव येथील तरुण गणेश शिवपुंजे याच्यावर चार महिन्यांपूर्वी प्रेम प्रकरणातून अथणी पोलीस ठाण्यात पोक्सो अंतर्गत गुन्हा दाखल झालेला आहे.
एका तरुणीसोबत त्याचं प्रेम प्रकरण सुरू होतं. काही दिवस दोघेजण पळून गेले होते. याप्रकरणी अथणी पोलीस ठाण्यात गुन्हा दाखल झाला आहे. काही दिवसांपूर्वी अल्पवयीन तरुणीला गणेश शिवपुंजेने गावात परत सोडलं होतं, अशी चर्चा आहे.अथणी पोलीस गणेश शिवपुजे या तरुणाच्या मागावर होते. मृत गणेश शिवपुंजे या तरुणाचा मृतदेह रांजणी गावच्या हद्दीत असणाऱ्या झाडाला लटकलेल्या अवस्थेत कवठे महांकाळ पोलिसांना आढळून आला आहे. तर पायाजवळ एक छोटी रश्शी पडलेली दिसून आली. घटनास्थळाचं वर्णन पाहता सर्व संशयास्पद दिसून येत आहे. कवठे महांकाळ पोलीस ठाण्यात रात्री उशिरापर्यंत घटनेची नोंद करण्यात आली नव्हती.
