लक्ष्मीनगरमध्ये २५ वर्षीय तरुणाची आत्महत्या; आईच्या परतल्यानंतर दुर्दैवी घटना उघड
जळगाव (प्रतिनिधी): कानळदा रोडवरील लक्ष्मीनगर भागात २५ वर्षीय सचिन उर्फ रामेश्वर लक्ष्मण भोई या युवकाने राहत्या घरात गळफास घेऊन आत्महत्या केल्याची हृदयद्रावक घटना मंगळवारी (८ जुलै) सकाळच्या सुमारास उघडकीस आली. विशेष म्हणजे, सचिनच्या आई मंगलाबाई या आषाढी एकादशीनिमित्त पंढरपूरहून घरी परत आल्यावर ही दुर्दैवी घटना समोर आली.
सचिन हा केळकर मॉलमधील कपड्यांच्या दुकानात काम करत होता आणि तो आईसोबत राहत होता. काही वर्षांपूर्वी त्याच्या वडिलांचे निधन झाले होते. आई घरी पोहोचल्यानंतर तिला सचिन घरात गळफास घेतलेल्या अवस्थेत आढळून आला. तातडीने त्याला शासकीय रुग्णालयात हलवण्यात आले; मात्र डॉक्टरांनी त्याला मृत घोषित केले.
या घटनेमुळे लक्ष्मीनगर परिसरात शोककळा पसरली असून, जळगाव शहर पोलीस ठाण्यात अकस्मात मृत्यूची नोंद करण्यात आली आहे. आत्महत्येमागील नेमके कारण अद्याप अस्पष्ट असून, पोलीस तपास सुरू आहे.
