जळगाव — जळगाव येथील जैन हिल्स परिसरातील आकाश ग्राउंडवर २ ते ८ ऑगस्ट २०२५ दरम्यान ३८वी राष्ट्रीय बुद्धिबळ अजिंक्यपद स्पर्धा रंगणार आहे.
या स्पर्धेचे आयोजन जैन इरिगेशन सिस्टिम्स लिमिटेडने केलं असून देशभरातून सुमारे ५०० खेळाडू सहभागी होत आहेत. यातील ४०० खेळाडूंना आंतरराष्ट्रीय फिडे मानांकन प्राप्त आहे.
या स्पर्धेची उल्लेखनीय बाब म्हणजे, ५५० नोंदणीकृत खेळाडूंमध्ये जवळपास ४०० खेळाडूंना फिडे मानांकन प्राप्त आहे. त्यात प्रथम मानांकित पुण्याचा अद्विक अग्रवाल (२२५१), मुलींमध्ये केरळची देवी बीजेस (१८६९) यांच्यासह अनेक खेळाडू हे आशियाई व जागतिक स्पर्धांमध्ये सहभाग घेतलेले आहेत. या स्पर्धेचे मुख्य आकर्षण म्हणजे, पहिले प्रत्येकी सर्वोच्च सहा सामने डिजिटल बोर्डवर लाईव्ह खेळले जातील. तसेच, चेसबेस (ChessBase) द्वारे स्पर्धेचे सामने त्यांच्या ॲपद्वारे लाईव्ह पाहण्यास मिळणार आहेत.
या स्पर्धेचे अजून एक वैशिष्ट्य म्हणजे, सर्व सहभागी खेळाडूंना त्यांच्या प्रत्येक डावातील निकालानुसार विजयी, उपविजयी व बरोबरीत असलेल्या खेळाडूंना विशेष मूल्यांकनानुसार रोख रकमेचे पारितोषिक जैन इरिगेशन सिस्टिम लिमिटेडतर्फे दिले जाणार आहे. प्रत्येक स्पर्धकांच्या उत्कृष्ट खेळासाठी प्रोत्साहेतू पुरस्कृत करणारी भारतातील ही एकमेव बुद्धिबळ स्पर्धा असेल, असे मत या स्पर्धेचे प्रमुख आयोजक, जळगाव जिल्हा बुद्धिबळ असोसिएशन व जैन स्पोर्ट्स अकॅडमीचे अध्यक्ष अतुल जैन यांनी याप्रसंगी मांडले.
सदर राष्ट्रीय अजिंक्यपद स्पर्धा यशस्वी करण्यासाठी अखिल भारतीय बुद्धिबळ संघटनेचे सल्लागार व जैन इरिगेशन सिस्टीम लिमिटेडचे चेअरमन श्री. अशोक जैन यांचे बहुमोल मार्गदर्शन लाभत आहे. तसेच महाराष्ट्र राज्य बुद्धिबळ संघटनेचे व जळगाव जिल्हा बुद्धिबळ संघटनेचे उपाध्यक्ष फारुख शेख, उपाध्यक्षा अंजली कुलकर्णी, जळगाव जिल्हा बुद्धिबळ संघटनेचे सचिव नंदलाल गादिया, खजिनदार अरविंद देशपांडे, सहसचिव शकील देशपांडे व संजय पाटील, सदस्य सर्वश्री चंद्रशेखर देशमुख, तेजस तायडे, पद्माकर करणकर, नरेंद्र पाटील, रवींद्र धर्माधिकारी, प्रवीण ठाकरे, रवींद्र दशपुत्रे, डॉ. तुषार उपाध्ये व सल्लागार सदस्य आर. के. पाटील, विवेक दाणी, यशवंत देसले, तसेच जैन स्पोर्ट्स अकॅडमी व जैन इरिगेशन सिस्टिम्स कंपनीचे सर्व सहकारी यांचे सहकार्य लाभत आहे.
