Another daring burglary in Jalgaon जळगाव (9 सप्टेंबर 2025) : अयोध्या नगरात धाडसी घरफोडी झाली असून स्वामी दर्शन अपार्टमेंटमधील एका फ्लॅटमधून चोरट्यांनी तब्बल तीन लाख 50 हजार 750 रुपयांचे सोन्या-चांदीचे दागिने लंपास केले. या प्रकरणी एमआयडीसी पोलिसात अज्ञात चोरट्यांविरुद्ध गुन्हा दाखल करण्यात आला.
घर बंद असल्याचा फायदा घेत चोरट्यांनी संधी साधली
आरती कृष्णा शिंपी (वय 49) यांनी दिलेल्या तक्रारीनुसार, त्या आपल्या कुटुंबीयांसह 27 ऑगस्ट रोजी मुंबई आणि सुरत येथे गेल्या होत्या. 10 दिवसांनंतर म्हणजेच 5 सप्टेंबर रोजी सकाळी त्या परत आल्या नंतर त्यांना घरात चोरी झाल्याचे निदर्शनास आले. अज्ञात चोरट्यांनी त्यांच्या बंद घराचे कुलूप तोडून आत प्रवेश केला. घरातील बेडरूममधील लोखंडी कपाटाचे दरवाजे उघडेच असताना चोरट्यांनी त्यातील सोन्या-चांदीचे मौल्यवान दागिने चोरून नेले. या चोरीमध्ये आरती शिंपी यांच्यासह त्यांच्या मैत्रिण बेबाबाई खोडपे यांचेही काही दागिने होते.
एमआयडीसी पोलिसांची धाव
एमआयडीसी पोलिस निरीक्षक बबन आव्हाड, पोलिस उपनिरीक्षक अशोक काळे यांनी घटनास्थळी भेट दिली. त्यांनी पाहणी करून पंचनामा केला. या चोरीप्रकरणी अज्ञात चोरट्यांविरुद्ध गुन्हा दाखल करण्यात आला. पोलिस उपनिरीक्षक चंद्रकांत धनके करीत आहेत.
