Three killed in horrific accident सांगली (9 सप्टेंबर 2025) : वॅगन आर कार व दुचाकी यांच्यात समोरासमोर झालेल्या धडकेत तिघांचा जागीच मृत्यू झाला तर चौघे गंभीर जखमी झाले. या घटनेनं तासगाव आणि पलूस तालुक्यात शोककळा पसरली.
तासगाव-भिलवडी मार्गावर तासगाव शहरापासून अवघ्या दोन किलोमीटर अंतरावर चेतना पेट्रोल पंपाजवळ मंगळवारी दुपारी भीषण अपघात घडला.
मिळालेल्या माहितीनुसार, हा अपघात दुपारी दोनच्या सुमारास घडला. सांगली येथील एका शिक्षण संस्थेतील चार शिक्षक वॅगन आर कारमधून कडेपूर येथील आदर्श शिक्षक पुरस्कार वितरण सोहळ्यासाठी गेले होते. यापैकी स्वाती अमित कोळी (रा, सांगलीवाडी) यांना आदर्श शिक्षक पुरस्काराने सन्मानित करण्यात आलं होतं. पुरस्कार स्विकारल्यानंतर हे शिक्षक कडेपूरवरून तासगावमार्गे सांगलीला परतत असताना हा अपघात घडला.
तासगावजवळ आल्यानंतर समोरून येणार्या दुचाकीशी कारची जोरदार धडक झाली. ही धडक इतकी भीषण होती की, दोन्ही वाहने रस्त्याच्या उजव्या बाजूला खाली द्राक्षबागेत कोसळली. या अपघातात दुचाकीवरील शिवाजी बापू सुतार (वय 57), आशाताई शिवाजी सुतार (वय 55) आणि त्यांचा पाच वर्षांचा नातू वैष्णव ईश्वर सुतार (रा. बुर्ली, ता. पलूस) यांचा जागीच मृत्यू झाला. हे तिघेही काकडवाडी येथे नातेवाईकांना भेटण्यासाठी गेले होते.
