स्विफ्ट कार डिव्हायडरला धडकून पलटी; अमरावतीच्या तरुण चालकाचा जागीच मृत्यू

वरणगाव (प्रतिनिधी) : भरधाव वेगात असलेली स्विफ्ट कार डिव्हायडरवर आदळून पलटी झाल्याची दुर्घटना ७ जून रोजी दुपारी दीड वाजेच्या सुमारास घडली. या अपघातात अमरावती येथील २६ वर्षीय युवकाचा जागीच मृत्यू झाला. अपघात वरणगावजवळील दिलीप मराठे यांच्या हॉटेलसमोर, भुसावळ-मुक्ताईनगर रोडवर घडला.
मृत युवकाची ओळख अब्दुल झाकीर अब्दुल शकील (वय २६, रा. अमरावती) अशी झाली आहे. तो स्विफ्ट डिझायर (क्र. एमएच २७ बीई ३७२०) कारने प्रवास करत होता. महामार्गावर गाडी चालवताना वेगावर नियंत्रण नसल्याने व रस्त्याच्या परिस्थितीकडे दुर्लक्ष केल्याने गाडी थेट डिव्हायडरवर आदळली व उलटली. यात कारचे मोठ्या प्रमाणात नुकसान झाले असून चालकाचा जागीच मृत्यू झाला.
या प्रकरणी गिरीश एकनाथ पाटील (वय ५०, रा. दर्यापूर, ता. भुसावळ) यांच्या फिर्यादीवरून वरणगाव पोलीस ठाण्यात गुन्हा दाखल करण्यात आला आहे.
पुढील तपास पोलीस उपनिरीक्षक अमितकुमार बागुल यांच्या मार्गदर्शनाखाली पोहेकॉ यासीन पिंजारी व प्रेमचंद सपकाळे करत आहेत.