कानळदा येथे किरकोळ कारणावरून बापलेकाला लोखंडी कळ्याने मारहाण
दोन जणांविरोधात जळगाव तालुका पोलीस ठाण्यात गुन्हा दाखल
जळगाव (प्रतिनिधी) : तालुक्यातील कानळदा येथे किरकोळ कारणावरून एकाच कुटुंबातील वडील आणि मुलाला शिवीगाळ करत लोखंडी कळ्याने मारहाण करण्यात आल्याची घटना शनिवारी १४ जून रोजी रात्री ९ वाजता घडली. या प्रकरणी दोघांविरोधात जळगाव तालुका पोलीस ठाण्यात रविवारी १५ जून रोजी मध्यरात्री ३ वाजता गुन्हा दाखल करण्यात आला आहे.
अधिक माहिती अशी की, अभिजित भगवान सपकाळे (वय १९, रा. कानळदा, ता. जळगाव) हे आपल्या कुटुंबासह कानळदा येथे वास्तव्यास आहेत. शनिवारी रात्री त्यांचे वडील भगवान सुनील सपकाळे यांच्याशी गावातील दादू शांताराम कोळी आणि शांतराम बापुराव कोळी यांचा किरकोळ कारणावरून वाद झाला. वादाच्या रागातून दोघांनी भगवान सपकाळे यांना शिवीगाळ करून मारहाण केली.
पित्याला मारहाण होत असल्याचे पाहून अभिजित सपकाळे हा भांडण सोडवण्यासाठी पुढे आला असता, त्यालाही लोखंडी कळ्याने डोक्यावर आणि पाठीवर मारहाण करून जखमी करण्यात आले.
या घटनेचा तपास जळगाव तालुका पोलीस करत असून, दोघांविरोधात संबंधित कलमांखाली गुन्हा दाखल करण्यात आला आहे.
