भाजप आमदार लोणीकर यांच्या वक्तव्याचा निषेध : शिवसेनेकडून जळगावात पुतळा दहन, तीव्र आंदोलनाचा इशारा
जळगाव (प्रतिनिधी) – शेतकऱ्यांविरोधात अवमानकारक वक्तव्य करणारे भाजपचे आमदार बबन लोणीकर यांच्या निषेधार्थ शिवसेना (उद्धव बाळासाहेब ठाकरे) पक्षाच्या वतीने जळगाव शहरात पुतळा दहन करून तीव्र संताप व्यक्त करण्यात आला. महायुती सरकारविरोधात जोरदार घोषणाबाजी करत शेतकरी विरोधी धोरणांवर सडकून टीका करण्यात आली.
महायुती सरकारने शेतकऱ्यांना निवडणुकीपूर्वी दिलेली कर्जमाफीची आश्वासने अद्याप पूर्ण केलेली नाहीत. त्यातच सरकारमधील काही आमदार बेताल आणि अवहेलनात्मक वक्तव्य करून शेतकऱ्यांच्या आत्मसन्मानाला ठेच देत आहेत. यावरून सरकारचा खरा चेहरा उघड झाला असून, हे वक्तव्य सामान्य शेतकऱ्यांचा अपमान असल्याचा आरोप शिवसेनेचे जिल्हाप्रमुख कुलभूषण पाटील यांनी केला.
“डोळेझाक म्हणजे समर्थन” – शिवसेनेचा हल्लाबोल
मुख्यमंत्री आणि उपमुख्यमंत्री हे या प्रकरणावर अद्याप मौन बाळगत असून, हे मौन म्हणजेच त्या वक्तव्याचे अप्रत्यक्ष समर्थन असल्याची टीका यावेळी करण्यात आली. “सत्तेचा गर्व झाला असून शेतकरी राजाला कमी लेखण्याचे प्रयत्न सुरू आहेत. शिवसेना हे खपवून घेणार नाही,” असे ठणकावत पाटील यांनी आमदार लोणीकर यांनी तात्काळ माफी मागावी, अन्यथा सरकारविरोधात तीव्र आंदोलन करण्यात येईल आणि ‘अंत्ययात्रा’ काढण्यात येईल, असा इशाराही दिला.
शिवसैनिकांचा उद्रेक
या निषेध आंदोलनात जिल्हाप्रमुख कुलभूषण पाटील, उपजिल्हाप्रमुख भाऊसाहेब सोनवणे, तालुकाप्रमुख उमेश पाटील, युवासेना जिल्हाप्रमुख पियुष गांधी, माजी शहर संघटक राजूभाऊ पाटील, महिला महानगर प्रमुख मनीषाताई पाटील, विभागप्रमुख विजय बांदल, विजय राठोड, जितेंद्र बारी, रुपेश पाटील, भैय्या वाघ, किरण ठाकूर, सचिन चौधरी, बापू मोणे, सतीश मोरे, दीपक पवार, मयूर गवळी, अंकित कासार, अनिल गवळी आदींसह मोठ्या संख्येने शिवसैनिक उपस्थित होते.
