भरधाव कारची धडक; दुचाकीस्वार प्रौढ गंभीर जखमी
रामानंद नगर चर्चजवळील घटना; कारचालकाविरुद्ध गुन्हा दाखल
जळगाव | प्रतिनिधी शहरातील रामानंद नगर परिसरात भरधाव वेगाने आलेल्या कारने दुचाकीस्वार प्रौढाला जोरदार धडक दिल्याची घटना दि. २५ मे रोजी दुपारी घडली. या अपघातात दुचाकीस्वार दिवानसिंग पाटील गंभीर जखमी झाले असून, त्यांच्या दुचाकीचेही मोठे नुकसान झाले आहे. अपघातानंतर कारचालक मदत न करता घटनास्थळावरून फरार झाला.
हरिविठ्ठल नगरातील राजपूत कॉलनीत राहणारे चेतन दिवानसिंग पाटील हे युवक असून, त्यांचे वडील (एमएच १९ ईएफ १५७३) क्रमांकाच्या दुचाकीवरून घरी येत असताना ही घटना घडली. रामानंद नगर चर्चजवळून ते जात असताना (एमएच १९ ९०७९) क्रमांकाच्या भरधाव कारने त्यांना जोरदार धडक दिली.
अपघातात दिवानसिंग पाटील गंभीर जखमी झाले असून, त्यांना तातडीने उपचारासाठी रुग्णालयात दाखल करण्यात आले. अपघातानंतर कारचालक कोणतीही मदत न करता घटनास्थळावरून पसार झाला.
याप्रकरणी चेतन पाटील यांच्या फिर्यादीवरून एमआयडीसी पोलिस ठाण्यात कारचालकाविरोधात गुन्हा दाखल करण्यात आला आहे. या प्रकरणाचा पुढील तपास पोलीस हवालदार शरद वंजारी करीत आहेत.
