मुंबई- रेनॉ लवकरच भारतात आपल्या सर्वात लहान आणि स्वस्त इलेक्ट्रिक कार ‘क्विड EV’ लॉन्च करण्याच्या तयारीत आहे. नुकतेच या कारचा टेस्टिंग मॉडल भारतीय रस्त्यांवर पाहायला मिळाला असून, ही रेनॉची भारतातली पहिली इलेक्ट्रिक कार असेल.
या कारच्या प्रोटोटाइपला काही वर्षांपूर्वी ऑटो एक्सपोमध्ये दाखवले गेले होते. आता पुन्हा एकदा याचे टेस्टिंग सुरू झाले आहे. ही कार युरोपमध्ये विकल्या जाणाऱ्या Dacia Spring EV वर आधारित असण्याची शक्यता आहे, जशी की पेट्रोल व्हर्जन क्विड आहे.
क्विड EV सर्वप्रथम 2019 मध्ये चीनमध्ये ‘सिटी K-ZE’ नावाने सादर झाली होती. यानंतर 2021 मध्ये ती युरोपमध्ये Dacia Spring EV म्हणून आणि लॅटिन अमेरिका मध्ये Renault Kwid E-Tech Electric या नावाने विकली गेली.
टेस्टिंग मॉडलनुसार, क्विड EV चे बाह्य स्वरूप पेट्रोल क्विडसारखेच आहे, मात्र यात थोडी उंच बॉडी बेस आणि टायर-व्हील आर्चमध्ये अधिक अंतर दिसते. कारच्या आतील डिझाइनची माहिती अद्याप समोर आलेली नाही, पण 10 इंच टचस्क्रीन आणि 7 इंच डिजिटल इन्स्ट्रुमेंट क्लस्टर मिळण्याची शक्यता आहे. सुरक्षेसाठी इमरजन्सी कॉलिंग, ABS, ESC, 6 एअरबॅग्ज, TPMS आणि ISOFIX चाइल्ड सीट माउंटिंग सारखे फीचर्स असू शकतात.
ही कार Dacia Spring EV प्रमाणे 26.8 kWh बॅटरी आणि 33 kW फ्रंट-व्हील ड्राइव्ह मोटरसह येऊ शकते. ही कार 0 ते 100 किमी प्रतितास वेग 19.2 सेकंदात पकडू शकते. यामध्ये फास्ट चार्जिंग सुविधा असणार असून, केवळ 45 मिनिटांत 20% ते 80% बॅटरी चार्ज होऊ शकते. पूर्ण चार्जवर ही कार सुमारे 225 किमी अंतर पार करू शकते आणि टॉप स्पीड 125 किमी/तास असण्याची शक्यता आहे.
रेनॉकडून अधिकृत घोषणा लवकरच अपेक्षित आहे आणि या कारच्या आगमनामुळे भारतीय इलेक्ट्रिक वाहन बाजारात स्पर्धा आणखी वाढण्याची शक्यता आहे.
