जामनेर पंचायत समितीचा ऐतिहासिक मान : जिल्ह्यातील पहिली ISO 9001:2015 प्रमाणित पंचायत समिती
जळगाव (प्रतिनिधी) : जामनेर पंचायत समितीने जिल्ह्यातील पहिली ISO 9001:2015 प्रमाणित पंचायत समिती होण्याचा मान पटकावला आहे. जिल्हा परिषदेच्या मुख्य कार्यकारी अधिकारी मिनल करनवाल यांच्या संकल्पनेतून राबविण्यात आलेल्या ग्रामपंचायत व पंचायत समित्यांच्या सक्षमीकरण मोहिमेतील हा महत्त्वपूर्ण टप्पा ठरला आहे. या यशाबद्दल करनवाल यांनी संपूर्ण जामनेर पंचायत समितीचे अभिनंदन केले आहे.
आंतरराष्ट्रीय दर्जाचे ISO मानांकन ही केवळ गुणवत्ता प्रमाणपत्र नसून, स्थानिक स्वराज्य संस्थांच्या सुशासन व कार्यक्षमतेकडे वाटचाल करणारे सकारात्मक पाऊल मानले जाते. जिल्ह्यातील पंचायत समित्या आणि ग्रामपंचायतींना आधुनिक व पारदर्शक कार्यपद्धती अंगीकारण्यासाठी प्रेरित करण्याचा उद्देश या उपक्रमामागे होता.
जामनेर पंचायत समितीने हे मानांकन मिळवण्यासाठी प्रशासनिक कार्यपद्धती, सेवा वितरण, नागरिकाभिमुखता, पारदर्शकता आणि गुणवत्तापूर्ण कामकाज या सर्व क्षेत्रात उल्लेखनीय सुधारणा केल्या. गुणवत्ता व्यवस्थापन, दस्तऐवजीकरण, जनसेवा प्रक्रियेतील शिस्तबद्धता तसेच कर्मचारी प्रशिक्षण यावर विशेष भर देण्यात आला.
या कामगिरीसाठी गट विकास अधिकारी श्रीकृष्ण इंगळे यांनी जामनेर पंचायत समितीच्या वतीने ISO प्रमाणपत्र स्वीकारले. जिल्ह्यातील इतर पंचायत समित्यांनी देखील यापासून प्रेरणा घेऊन आपल्या कार्यपद्धतीत सुधारणा कराव्यात, असे आवाहन करनवाल यांनी यावेळी केले.
